کابل ټيليګراف (د مرغومي ۳يمه – ۱۴۰۳ لمريز)
راپورونه وايي، تېره شپه (د مرغومي لومړۍ) نامعلومه کسانو د ننګرهار په خوګياڼو ولسوالۍ کې د ابکو صاحب په نوم يوې مدرسې ته اور اچولی دی.
پر ټولنيزو شبکو په خپرو شويو عکسونو کې ليدل کېږي، چې يوازې د مدرسې کتابتون ته زيان اوښتی او کتابونه ټول ايره شوي دي، خو نورې برخې روغې پاتې دي.
تر دې وړاندې هم په ننګرهار کې د نجونو ښوونځيو ته اور اچول شوی او په يوې مدرسې کې د قران عظيم الشان نسخو ته د توهین ويډيوګانې خپرې شوې دي، خو د يوې پېښې د عاملينو په تړاو هم معلومات رسنيز نشول.
دا په داسې حال کې ده، چې له دې درې میاشتې وړاندې د ننګرهار په چپرهار ولسوالۍ کې هم نامعلومو کسانو د یوې دیني مدرسې قرانکریمونه او نور دیني کتابونه سوځولي وو.
