کابل ټیلیګراف – ۳۱ غویی ۱۴۰۴ لمریز کال
ملګرو ملتونو خبرداری ورکړی، که په راتلونکو ۴۸ ساعتونو کې غزې ته مرستې ونه رسېږي، د ۱۴ زره ماشومانو د مړینې خطر شته.
د ملګرو ملتونو د بشري چارو مرستیال سکرتر جنرل ټام فلیچر دا خبرداری هغه مهال ورکړ، کله چې اسرائیلو د دوشنبې په ورځ ۵ مرستندویه بار وړونکو موټرو ته د غزې د ننوتلو اجازه ورکړه.
فلیچر وویل، هغه غواړي په راتلونکو ۴۸ ساعتونو کې د دغو ۱۴ زره ماشومانو ژوند وژغوري.
د بریتانوي خبري چینل سره په خبرو کې فلیچر وویل، د ۵ ټرکونو له لارې راوړل شوې مرستې د اړتیا په پرتله “په سمندر کې یو څاڅکی” دی.
نوموړي زیاته کړې، مرستندویه توکي، چې پکې د ماشومانو لپاره خواړه شامل دي، د سرحد بل اړخ ته موجود دي، خو تر اوسه یې هیڅ ټولنې ته نه دي رسېدلي.
فلیچر هیله څرګنده کړه، چې دوی به د سې شنبې په ورځ ۱۰۰ ټرکونه غزې ته داخل کړي.
هغه وویل، موږ غواړو غزه د بشري مرستو سره ډکه کړو. مرستیال سکرتر جنرل د بریتانیې، فرانسې او کاناډا لخوا د غزې د بشري بحران سره د مقابلې لپاره د اسرائیلي طریقې د غندنې هرکلی کړی.
هغه وویل، دا سخت الفاظ وو، خو اصلي ازموینه دا ده چې ایا ملګري ملتونه غزې ته نورې مرستې رسولی شي که نه.
