کابل ټیلیګراف – ۴ زمری ۱۴۰۴ لمریز کال
د متحده عرب اماراتو (یو اې ای) هوايي شرکت “ایمریټس” د نړۍ په بېلابېلو هېوادونو کې د نږدې ۱۸ زرو نويو کارکوونکو د ګومارنې اعلان وکړ.
د عربي ویبپاڼې “ګلف نیوز” په وینا، ایمریټس ایرلاین د جولای په ۲۵مه د نړۍ په بېلابېلو هېوادونو کې د ۱۷ زره او ۳۰۰ نويو کارکوونکو د ګومارنې اعلان وکړ.
دا شرکت، چې د نړۍ له سترو هوايي شرکتونو څخه دی، د ۱۳۶ بېلابېلو دندو لپاره نارینه او ښځینه کارکوونکي ګوماري او د خالي پوستونو لپاره د ګومارنې بهیر به څو میاشتې دوام وکړي.
د شرکت په ویبپاڼه کې ویل شوي چې د سویلي اسیا په هندوستان کې به لسګونه کسان وګمارل شي، خو په پاکستان، بنګلهدېش، سریلانکا، نیپال او بوټان کې به هیڅ ګومارنه ونه شي.
د منځني ختیځ په سعودي عربستان، ایران او متحده عرب اماراتو کې به هم لسګونه کسان ګومارل شي.
د ګلف نیوز په وینا، د نويو ګومارنو په دې لړۍ کې د ایمریټس ایرلاین ځینې لوړو پوستونو ته ګومارل شوي کارکوونکي به تر میاشتې ۴۸ زره اماراتي درهمه معاش ترلاسه کړي.
کارکوونکو ته به د ښو معاشونو ترڅنګ طبي او نورې بیمې او بونس هم ورکول کیږي.
