کابل ټیلیګراف – ۲۲ زمری ۱۴۰۴ لمریز کال
د امریکا د بهرنیو چارو وزارت په خپل کلني راپور کې اعلان کړی چې د طالبانو له خوا د بشري حقونو رعایتول د پام وړ کم شوي دي.
د امریکا د بهرنیو چارو وزارت سه شنبه د زمري پر ۲۱مه د بشري حقونو په تړاو خپل راپور خپور کړی دی.
د دې راپور له مخې، د طالبانو له خوا خپلسرې وژنې، تښتونې، شکنجې او نا انسانی چلند لا هم دوام لري.
په راپور کې راغلي چې طالبانو او د داعش خراسان څانګې په جلا جلا توګه ماشومان استخدام کړي دي.
راپور زیاتوي چې طالبانو ګڼ کسان له مخکیني حکومت سره د همکارۍ په تور وژلي دي.
د امریکا د بهرنیو چارو وزارت دغه راز ویلي چې طالبانو له اسلامه د خپل تفسیر پر بنسټ داسې قوانین وضع کړي چې د ښځو بنسټیز حقونه یې په ښکاره توګه نقض کړي دي.
دا راپور په داسې حال کې خپور شوی چې طالبان پر افغانستان د خپلې واکمنۍ د څلورمې کالیزې په درشل کې دي.
