کابل ټیلیګراف ۷وږی ۱۴۰۴ لمریز کال
شهسوار د اچین ولسوالۍ اصلي اوسېدونکی او اوس د شینوارو ولسوالۍ په ۲۸مه ویاله کې اوسېږي، چې وړمه شپه شاوخوا یوولس بجې یې پر کور پاکستاني بې پیلوټه الوتکو دوه پرلپسې بریدونه وکړل.
نوموړی وایي، هغه مهال یې مېلمه درلود چې پر کور یې هوایي برید وشو.
شهسوار د ډرون د حالت کیسه له کابل تیلیګراف سره داسې کوي:
«تېره شپه یوولس بجې، زه میلمه سره حجره کې پروت وم، ډرون راغی زما په کور یې بم را ویشتی،زما پنځه بچي یوه مېرمن دا ټول یې ټپيان کړل، ما چې ټپيان دروازې پورې رارسول یو بل ډرون یې هم وکړ، خو ټپیان مو روغتون ته انتقال کړل».
نوموړي وایي دغه برید ترې هرڅه واخیستل او په کور کې د وسایلو په نامه یې هېڅ شی ور پرېښودل، هغه له حاکم نظامه د مرستې غوښتنه کوي.
شهسوار وایي: «دغه زما کور دی په دې کې هېڅ شی روغ نه دی پاتې، هېڅ څه شی په کې روغ نه دي پاتې هرڅه یې راته له منځه وړي، مالونه، کوټې هرشی».
په ورته مهال ځایي قومي مشران هم د شهسوار لپاره د مرستې غوښتنه کوي او وایي، نوموړی ډېر بېوزله او د یوه وخت د ډودۍ توان نه لري.
خو بل لورته ننګرهار کې د طالبانو ولایتي چارواکو د شهسوار له کوره لیدنه کړې او هلته یې له هغه سره یو څه نغدي مرسته هم کړې ده.
د طالبانو د ولایت د رسنیو دفتر په یوه خبرپاڼه کې ویلي، چې دوی د اړتیا وړ مرسته له شهسوار سره ترسره کړي.
پاکستان ډرون الوتکو وړمه ورځ په ننګرهار او خوست ولایتونو کې ډرون بریدونه وکړل چې له امله یې ۳ تنه مړه او ۷ تنه نور ژوبل شول.
په غبرګون کې د طآلبانو د حکومت د بهرنیو چارو وزارت په کابل کې د پاکستان سفیر احضار کړی دې او د افغانستان د احتجاجليک یې هم د پاکستان سفیر ته ور سپارلی دی.
دغه بریدونه په کور دننه په پراخه کچه وغندل شول او د پاکستان دغه چاره یې د نړیوالو ټولو قوانینو خلاف عمل وباله.
پخواني ولسمشر حامدکرزي په خپله اېکس پاڼه دا برید د افغانستان پر خصوصي حریم تېری بللی وو او زیاته کړې وه ، چې پاکستان به هم پر دا ډول بریدونو خلاصون ونه مومي.
