کابل ټیلیګراف ۸وږی ۱۴۰۴ لمریز کال
د افغان وګړو د محرمو معلوماتو د افشاء په پار او د ( ۲۰۲۱ کال) له پېښې وروسته، د امنیتي سپارښتنو د بشپړې نه پلي کېدو په اړه د وضاحت په خاطر، د بریتانیا د علومو، نوښت او ټکنالوژۍ کمېټې د دولت لوړپوړي چارواکي پارلمان ته احضار کړي دي.
دغه پېښه چې د دفاع وزارت د تېروتنې له امله رامنځته شوې وه، د هغو افغانانو نومونه او د هغوی د اړیکو معلومات یې علني کړل، چې له بریټانوي ځواکونو سره یې همکاري کړې وه.
د دې معلوماتو تر افشاء وروسته د هغو افغان وګړو ژوند له جدي ګواښ سره مخ دی، چې په دې لېست کې شامل دي.
د کمېټې مشرې چي اونوراه، پرون د جمعې په ورځ ناوخته اعلان وکړ چې د بریټانیا پخواني حکومت د یوې محرمې امنیتي څېړنې له ۱۴ سپارښتنو یوازې ۱۲ عملي کړي او دوه نورې تر اوسه بې پایلې دي.
یاده څېړنه چې په ۲۰۲۳ کال کې شوې وه، خو نه ده خپره شوې، د ۲۰۰۸ څخه تر ۲۰۲۳ پورې د معلوماتو یوولسو سختې پېښې نغاړي، چې په دغو پېښو کې د دفاع وزارت د ایمیل د استولو تېروتنه تر ټولو جدي وه.
په دې ایمیل کې د هغو افغان ژباړونکو شخصي معلومات چې په جګړه کې یې د طالبانو پر وړاندې له بریتانوي ځواکونو سره مرسته کړې وه، د بریتانوي پوځیانو او امنیتي مأمورینو له معلوماتو سره یوځای افشا شوي دي.
د ساینس او ټکنالوژۍ کمېټې منلې چې له ۱۴ سپارښتنو ۱۲ عملي شوې دي، خو تر اوسه څرګنده نه ده چې کومې دوه یې نه دي پلي شوي.
ټاکل شوې ده چې مکفادن او ادواردز د سپتمبر په میاشت کې د پارلمان غونډې ته لاړ شي او نور جزییات وړاندې کړي.
