کابل ټیلیګراف ۸وږی ۱۴۰۴ لمریز کال
روسیې، د راتلونکې میاشتې د ګډو پوځي تمرینونو په جریان کې د جاپان له خوا د امریکا د «تایفون» منځني واټن توغندیو د ځای پرځای کولو په غبرګون کې، توکیو ته د مناسبو پوځي-تخنیکي اقداماتو د ترسره کولو خبرداری ورکړ.
د روسیې د بهرنیو چارو وزارت ویاندې ماریا زاخارووا د تاس خبري اژانس ته ویلي، چې د روسیې په نږدې سیمو کې د تایفون توغندیو ځای پرځای کول د مسکو لپاره مستقیم ستراتیژیک ګواښ دی.
په ورته وخت کې، چین هم ویلي، چې امریکا او جاپان دې د تایفون توغندیو د لنډمهاله ځای پرځای کولو له لارې د سیمې سوله او ثبات کمزوری نه کړي.
د راپور له مخې، د تایفون سیستم د اسیا په کچه د کښتیو ضد وسلو د راټولولو لپاره د امریکا د هڅو برخه ده.
دا توغندي به د سپټمبر په ۱۱مه د جاپان په یوه هوایي اډه کې، چې د امریکا د سمندري ځواکونو لخوا کارول کېږي، ځای پرځای شي.
