کابل ټیلیګراف ۸وږی ۱۴۰۴ لمریز کال
د افغانستان د سوداګرۍ خونې پخوانی رئیس آذرخش حافظي د طالبانو لخوا د افغان شخصیتونو سره د اړیکو د کمېسیون له لارې له جرمني څخه هیواد ته راستون شو.
هغه وايي، د ناروغۍ له امله یې یو څه وخت له هیواده بهر تېر کړ، خو اوس د وطن د راستنېدو له امله ډېر خوشحاله دی.
حافظي زیاته کړه، چې له خپلو ملګرو او همکارانو سره به په هیواد کې تر خپل توانه د افغانستان د ابادۍ لپاره هڅې وکړي.
طالبانو له افغان شخصیتونو سره د اړیکو او هېواد ته د هغوی د راستنولو لپاره یو کمېسیون جوړ کړی، چې مشري یې د کانونو او پټرولیم سرپرست وزیر شهاب الدین دلاور کوي.
د دې کمېسیون موخه د بهر مېشتو سیاسي او ټولنیزو شخصیتونو هڅول دي، چې بېرته افغانستان ته راستانه شي، خو اکثریت پخواني شخصیتونه له راستنېدو وروسته بېرته له هېواده وتلي دي.
