د طالبانو د حکومت مالیې وزارت ویلي، نړیوال بانک چمتو دی، د هغو پروژو او قراردادي شرکتونو د پیسو د بیا ورکړې لړۍ، چي اسناد یې د دغه بانک د څارني ټیم (TPMA) او د طالبانو له لوري څېړل شوي او نهايي شوي، پیل کړې ده.
یاد وزارت پرون (شنبه، د لیندۍ لومړۍ نېټه) ویلي، له نړیوال بانک سره یې د پرلهپسې اړیکو، هڅو او همکاریو په پایله کي دغه بانک د خپل دفتر له بیا پرانیستلو سره سم، په افغانستان کي خپل فعالیتونه هم پیل کړل.
سرچینې لیکلي، چې اوسمهال دغه بانک چمتو دی، ترڅو د هغو پروژو او قراردادي شرکتونو پیسې ورکړي، چي اسناد یې د تېرحکومت پرمهال له بیا واکمنې څخه مخکې بشپړ او طی مراحل شوي وو.
نړیوال بانک د هغو پروژو او قراردادي شرکتونو د پیسو د بیا ورکړې لړۍ، چي اسناد یې د دغه بانک د څارني ټیم (TPMA) او د مالیې وزارت له لوري څېړل شوي او نهايي شوي دي، پیل کړې ده.
دغه وزارت په خپلې خبرپاڼې کې زیاته کړې چې د څېړنو له مخې نړیوال بانک له قراردادی شرکتونو څخه نږدې (۴۵) میلیونه ډالر پوروړی دئ، چي دغه پور به په څلورو پړاوونو کي له مالیې وزارت سره په همغږۍ قراردادي شرکتونو ته ورکړي.
په لومړي پړاو کي به نړیوال بانک (۹،۳) میلیونه ډالر په مستقیم ډول بهرنیو قراردادي شرکتونو ته ورکړي، په دوهم پړاو کي به، چي اوسمهال پیل شوی(۱۶،۸) میلیونه ډالر د مالیې وزارت له لاري شرکتونو ته ورکړل شي او په راتلونکو درېیم او څلورم پړاوونو کي به د دې شرکتونو نور تادیات هم په نوبت سره اجرا او ورکړل شي.
