د کندهار لپاره د طالبانو د والي دفتر نن سه شنبه د یاد ولایت په سپین بولدک ولسوالۍ کې ۹۵ ښوونځیو او ۲۱ دیني مدرسو ته د «امارت پېژندنې» کتاب د وېشلو اعلان وکړ
د طالبانو د کندهار د والي دفتر په خپرې شوې خبرپاڼه کې راغلي چې « نن سه شنبه د زمري په ۳۰مه مو په کندهار کې د اطلاعاتو او کلتور ریاست له لورې د امارت پېژندنې کتاب د ښوونځیو زده کونکو ته د ازموینې د اخېستلو په موخه ووېشل»
طالبانو تر دې وړاندې هم د افغانستان په ځینو ولایتونو کې د «امارت پېژندنې» ازموینه اخیستې ده.
د طالبانو امارات پېژندنې په کتاب کې د خپلو مشرانو او پېښو په اړه په معلوماتو کې لاسوهنه کړې ده او طالبانو په دې کې د خپلو مشرانو او هېواد کې د شویو پېښو په اړه خپل تبلیغات ځای پر ځای کړي دي.
طالبان د دې کتاب په خپرولوسره هڅه کوي، چې د دې ډلې په اړه د خلکو نظر بدل کړي او په دې اړه معلومات ورکړي.
طالبانو په ۱۴۰۰ میلادي کال کې د افغانستان د واک له اخیستو راهیسې د نجونو له شپږم ټولګي پورته ښوونځي تړلي، نجونې یې پوهنتون ته له تګ څخه منع کړې او پر ښځو یې سخت بندیزونه لګولي دي.
