د کرکټ نړیوالې شورا «ایسيسي» په پام کې لري چې د یوه پلان لهمخې د ۲۰۲۵م کال چمپینز ټرافي سیالۍ له پاکستانه بهر ترسره کړي.
هندي رسنیو پنجشنبه د اکټوبر پر ۱۰مه راپور ورکړی چې د کرېکټ نړیواله شورا د پاکستان پرځای بل هېواد ته د چمپینز ټرافي د ټولو لوبو پر لېږد غور کوي.
له دې وړاندې ایسيسي ویلي وو که چېرې هندی حکومت خپله د کرېکټ ملي لوبډله پاکستان ته له تګ منع کړي، نو هڅه به دا وي چې یادې لوبې په متحده عربي اماراتو کې ترسره شي.
سوېلي افریقا او سریلانکا هغه دوه نور هېوادونه دي چې د کرېکټ نړیوالې شورا د چمپینز ټرافي لپاره په پام کې نیولي دي.
نوموړې شورا دا ګام وروسته له هغه پورته کړ چې د هند کرېکټ بورډ ګاونډي هېواد ته د خپلې ملي لوبډلې په لېږلو کې زړه نا زړه وه.
بلخوا، د پاکستان کرېکټ بورډ مشر محسن نقوي په وار-وار ویلي چې یاده ټرافي به په دغه هېواد کې ترسره کېږي او کډون کوونکې لوبډلې به پهکې برخه اخلي.
که څه هم ټاکل شوې چې چمپینز ټرافي د راتلونکي ۲۰۲۵م کال فبرورۍ پر ۱۹مه په لاهور، کراچۍ او راولپېنډۍ لوبغالو کې پیل او د مارچ پر ۹مه به پای ومومي، خو د کره ځای په اړه یې لا هم وروستۍ پرېکړه نه ده شوې.
د یادونې ده، له پاکستان څخه بل هېواد ته د چمپینز سیالیو د لېږد بحث هغه مهال راپورته شو چې د یاد هېواد امنیتي او سیاسي وضعیت له بل هر وخته ډېر کړکېچن او د اندېښنې وړ شو.
