د طالبانو په حکومت کې د ریاست الوزراء اقتصادي مرستیال ملا عبدالغني برادر اخوند له لوري نن له کابل څخه د میدان وردګو ولایت د سیدآباد ولسوالۍ تر دشت ټوپ سیمې پورې د دوهم سړک د لومړي او دوهم فاز کار پیل شو.
ملا عبدالغني برادر د سړک د کار د پرانیستلو په مراسمو کې وویل چې په ترانسپورټي او مواصلاتي زېربناوو کې پانګونه د طالبانو د حکومت په اساسي او مهمو اقداماتو کې شمېرل کیږي او د خپلې دغې ژمنې د عملي کولو په لړ کې نن د دې مهمې پروژې کار پیلوي.
ملا برادر زیاته کړه؛ د غزني او کابل ترمنځ د دوهم لين سړک جوړول د مرکز او سوېل ترمنځ د نښلېدو بنسټيز پل دی چې په پايله کې به يې سوداگریز فعالیتونه آسانه، د توکو د لېږد وخت او لګښتونه به کم او د دې لارې مسافرو ته به آسانتیاوې برابرې شي.
هغه زیاته کړه، د کابل ـ کندهار لویه لاره به د مرکز او سوېل پر نښلولو سربېره له ایران، پاکستان او نورو هیوادونو سره زموږ سوداگریز مسیر لا غښتلی کړي.
د يادولو وړ ده چې له کابل څخه تر غزني پورې د دوهم لین سړک ۱۱۱ کیلومټره اوږدوالی لري چې په اوږدو کې یې ۹ لوی پلونه او ۵۹۴ پلچکونه شته چې چارې به یې په ټاکل شوې موده کې پای ته ورسیږي.
