د افغانستان لپاره د امریکا د سولې پخواني استازي زلمي خلیلزاد، ټول افغان ملت ته، د اسیا اېمرجېنګ جام په سیالیو کې د افغانستان کرېکټ د الف لوبډلې د اتلولي مبارکي ویلې ده.
د افغانستان الف لوبډلې د دغو سیالیو په پایلوبه کې سریلانکا ته پر ۷ ویکټو ماتې ورکړه او د اسیا اېمرجېنګ جام اتلولي خپله کړه.
په دغه سیالۍ کې د سریلانکا الف لوبډلې لومړۍ توپوهنه ترسره کړه او په ټاکل شوو شل اورونو کې یې د ۷ لوبغاړو په سوځېدو سره ۱۳۳ منډې وکړې.
په مقابل کې افغان ابدالیان لوبډلې ورکړل شوې هدف د درې لوبغاړو په سوځېدو سره په ۱۸ اور کې پوره کړ او د سریلانکا الف لوبډلې ته یې د ۷ وېکټو په توپير ماتې ورکړه او په دې سره یې د لومړي ځل لپاره د ځوانانو اسیا جام سیالیو اتلولي وګټله.
