کابل ټيليګراف (د مرغومي ۴مه – ۱۴۰۳ لمريز)
سرچینې وایي، د ننګرهار ولایت مرکز جلال اباد ښار کې نن د هندوستان قونسلګرۍ پر افغان کارمند ودود شیرزاد باندې ډزې شوي، خو هغه ته کوم زیان ندی اوښتی.
د سرچینو د معلوماتو له مخې؛ په دغه پېښه کې د هغه یو ساتوونکی وژل شوی او یو بل ټپي دی.
تر اوسه د دې پېښې په اړه طالبانو او یا خپله د هند قونسلګرۍ څه ندي ویلي.
د سرچینو په وینا د جلال اباد ښار له بېز اکمالاتي سره نږدې د هند کونسلګرۍ پر یو موټر ډزې شوي چې پکې له ناستو کسانو یو وژل شوی او بل ټپي دی.
دا په داسې حال کې ده چې نن د پاکستان ځانګړي استازي په کابل کې د طالبانو له کورنیو چارو وزیر سره کتلي او د دوه اړخیزه اړیکو او همکارۍ په اړه یې خبرې اترې کړې دي.
