کابل ټيليګراف (سلواغه 14مه– ۱۴۰۳ لمريز)
په بامیانو کې ځایي سرچینو خبر ورکړی چې طالبانو په بامیانو ولایت کې یوه چینایي الاصله امریکایۍ ښځه او څلور نور کسان چې د هغې ملتیایې کوله، نیولي دي.
سرچینو تائید کړې چې دا ښځه او د هغې ملګري چې یوه بله ښځه او درې نارینه پکې شامل دي، پرون د سلواغې پر ۱۳مه له ماسپښین وروسته د بامیانو په یکاولنګ ولسوالۍ کې نیول شوي دي.
د سرچینو په وینا، یوه افغانه ښځه او یو نارینه چې له کلونو وروسته بېرته خپل هېواد ته راستانه شوي، له موټر چلوونکي او ژباړن سره یو ځای، د نیول شویو کسانو په ډله کې دي.
په بامیانو ولایت کې طالبانو تر اوسه په دې اړه څه نه دي ویلي.
