کابل ټیلیګراف – ۱۳ وری ۱۴۰۴ لمریز کال
د ماشومانو لپاره د ملګرو ملتونو د ملاتړ صندوق (یونیسف) په یوه راپور کې ویلي، چې اسراییلو غزه کې د اوربند له پای ته رسېدو وروسته شاوخوا تېرو دوو اونیو کې لږ تر لږه ۳۲۲ ماشومان وژل او ۶۰۹ نور ټپیان کړي دي.
راپور کې راغلي، چې اسراییلي یرغلګرو غزې ته د بشري مرستو د مخنیوي له لاري د ملکي وګړو په ځانګړي ډول د ماشومانو ژوند له جدي ګواښ سره مخ کړی دي.
په غزه کې د اوربند لومړي پړاو له پايته رسېدو وروسته دواړه غاړې د اوربند په غځېدو ونتوانېدې او دوه اوونۍ وړاندې د مارچ پر ۱۸ نېټه اسرائيلو يو ځل بيا پر غزه بريدونه پيل کړل.
د ۲۰۲۳ کال د اکتوبر ۷مې نېټې پر اسرائيلو د حماس بریدونو کې له ۱۲۰۰ زیات کسان ووژل شول، چې ډېری یې ملکي وګړي وو، او ۲۵۱ کسان نور يرغمل ونيول شول.
په ځواب کې، اسرائیلو پر غزه بريد وکړ چې په غزه کې د حماس تر ولکې لاندې د روغتیا وزارت چارواکي وايي، تر دې مهاله نژدې ۵۰ زره کسان وژل شوي، چې ډېری یې ملکي وګړي دي.
د جګړې له کبله د غزې ۲.۱ میلیونه اوسېدونکي څو ځله بېځایه شوي. شاوخوا ۷۰ سلنه ودانۍ ویجاړې شوې او یا زیانمنې شوې دي، د روغتیا، اوبو، او فاضلهاوبو سیستمونه له منځه تللي، او د خوراکي توکو، سون، درملو او سرپنا سخت کمښت دی.
