کابل ټیلیګراف – ۲۸ وری ۱۴۰۴ لمریز کال
اسرائیلي ځواکونو د غزې د کډوالو پر خیمو بریدونو کې ۲۳ فلسطیني وګړي وژلي او ګڼ شمېر نور یې ټپيان کړي دي.
د راپورونو له مخې؛ دغه بریدونه په درې جلا سیمو کې ترسره شوي دي، چې له امله یې د مرګ ژوبلې ترڅنګ ګڼ شمېر خیمو کې اور لګیدنه هم رامنځته شوې او د استوګنې وسایل هم سوزیدلي دي.
د یو بل خبر له مخې؛ یو فلسطینی وګړی، چې د اسرائیلو سره بندي و، خپل ژوند له لاسه ورکړی دی.
د «د اسیرانو او آزادو کسانو د چارو هیئت» په راپور کې ویل شوي، مصعب عُدیلي، ۲۰ کلن ځوان و، چې د کرانه باختری په شمال کې د حواره کلي اوسېدونکی و او تازه د اسرائیلو په یوه زندان کې وژل شوی دی.
د یاد کس په وژل کېدو سره د اسرائیلو په زندانونو کې د وژل شویو فلسطیني بندیانو شمېر ۶۶ تنو ته ورسید.
