کابل ټیلیګراف –۴وږی ۱۴۰۴ لمریز کال
تر فشارونو وروسته د جرمني حکومت پرېکړه کړې، چې له پاکستانه د زیانمنو افغانانو د منلو او لېږد ځنډول شوې لړۍ بېرته پیلوي.
دا پرېکړه وروسته له هغه کېږي چې له پاکستانه د افغان کډوالو د شړلو لړۍ چټکه شوه، چې جرمني ته منل شوي افغانان هم اغېزمنوي.
جرمني د افغان همکارانو د لېږد پروګرام د کډوالۍ د محدودولو په ژمنه کې ځنډولی و.
د بشري حقونو ډلې او لسګونه اغېزمن افغانان په محکمو کې د دې پرېکړې پر وړاندې دعوه وکړه او ځینو یې د محکمې د ګټې وړ پرېکړې هم ترلاسه کړې چې پر برلین یې فشار ډېر کړ.
راپورونه د حکومتي سرچینو له قوله لیکي چې، اغېزمنو کورنیو ته لا دمخه د پروګرام د بیا پیل خبر ورکړل شوی او تمه کېږي لومړۍ افغان کورنۍ په راتلونکو ورځو کې جرمني ته ورسېږي.
د راپور له مخې، حکومت غواړي دغه افغانان په پټه د عادي سوداګریزو الوتنو له لارې، چې د دوبۍ یا استانبول له لارې تېرېږي، جرمني ته ولېږدوي.
