کابل ټیلیګراف ۸وږی ۱۴۰۴ لمریز کال
د ملګروملتونو سرمنشي انتونیو ګوترېش د اسراییلو له لوري د غزې ښار د احتمالي اشغال پر پلان سخته اندېښنه څرګندې کړې او هغه یې د یوې نوې او خطرناکې مرحلې پیل بللی دی.
نوموړي پر ټولنیز شبکه «ایکس» لیکلي چې، غزه یو ځل بیا له مرګونو جنجالونو سره مخ ده او په خبره یې د اسراییلو اعلان چې غواړي د غزې ښار اشغال کړي، د یوې نوې او خطرناکې مرحلې نښه ده.
د ګوترش په وینا، که دا اقدام عملي شي، د یوې سترې بشري فاجعې لامل به شي.
ځکه په وینا یې، اوس هم د غزې شاوخوا دوه میلیونه اوسېدونکي د خوراکي توکو، اوبو، برښنا او درملو له سختې کمي سره مخ دي.
هغه له نړیوالې ټولنې وغوښتل چې د جګړې د پراخېدو د مخنیوي لپاره عاجل ګامونه پورته کړي او پر اسراییلو فشار راوړي، څو له اشغال او پراخو نظامي عملیاتو ډډه وکړي.
د ملګروملتونو د شمیرو له مخې، د روانې جګړې له پیله تر اوسه لسګونه زره فلسطینیان وژل شوي او سلګونه زره نور ټپیان دي، چې ډېری یې ښځې او ماشومان دي.
نړیوال بشري بنسټونه هم خبرداری ورکوي چې د غزې د ښار هر ډول اشغال به د ملکي وګړو پر ژوند مستقیم اغېز ولري او د بشري ناورین کچه به څو چنده زیاته کړي.
