کابل ټیلیګراف ۸وږی ۱۴۰۴ لمریز کال
د بهرنیو رسنیو د راپورونو له مخې، د جمعې په ورځ د غزې په بېلابېلو برخو کې د اسرائیلي بریدونو له امله لږ تر لږه ۶۷ فلسطینیان وژل شوي، چې پکې ۶ د مرستو غوښتونکي هم شامل دي.
فلسطیني روغتیايي کارکوونکو الجزیرې ته ویلي، چې د منځنۍ غزې په یوه برخه کې ۳ د مرستو غوښتونکي د اسرائیلي پوځ لخوا په ډزو وژل شوي دي.
همدارنګه، د خان یونس په لویدیځه برخه کې د اسرائیلي هوايي بریدونو له امله لږ تر لږه ۵ فلسطینیان وژل شوي او لسګونه نور ټپیان دي.
بل لوري ته، په غزه کې د لوږې له امله د مړو شمېر ۳۲۲ ته رسېدلی دی.
اسرائیلي پوځ ادعا کړې، چې د غزې له تړانګه یې د یو اسرائیلي یرغمال مړی او د بل یرغمال کارول شوي توکي موندلي دي، خو نور جزییات نه دي ورکړل شوي.
د فلسطیني چارواکو په وینا، په نږدې دوه کلنه جګړه کې تر اوسه د اسرائیل لخوا ۶۲,۶۰۰ زیات فلسطینیان وژل شوي، چې ډېری یې ښځې او ماشومان دي.
