نن د امنیت شورا په ناسته کې د افغانستان په اړه ۳میاشتنی راپور وړاندې کېږي
کابل ټیلیګراف د وږي ۲۶مه ۱۴۰۴ لمریز کال
ټاکل شوې چې نن د ملګرو ملتونو امنیت شورا د افغانستان په اړه غونډه وکړي او پکې به د افغانستان په اړه درېمیاشتینی راپور هم وړاندې شي.
د راپورونو له مخې چې په دې غونډه کې به د ملګرو ملتونو د بشري حقونو کمېشنر «ولکر ترک» او همداراز د مدني ټولنې استازي هم ګډون ولري.
د مالوماتو له مخې د امنیت شورا په نننۍ غونډه کې به د یوناما مخکنۍ مشره «روزا اتونبایوا» د افغانستان په اړه خپل درېمیاشتینی راپور هم وړاندې کړي.
تر دې مخکې په افغانستان کې د ملګرو ملتونو د مرستندوی پلاوي دفتر (یوناما) پر مشرې، روزا اتونبایوا بېلابېلې نیوکې هم شوې وې.
بلخوا دې سازمان په وروستیو کې یو ځل بیا په افغانستان کې د بشري بودیجې د کمښت او د طبیعي پېښو له امله د ځپلشویو افغانانو پر نازک وضعیت اندېښنې هم ښودلې دي.
د ملګرو ملتونو د بشري مرستو د همغږۍ دفتر (اوچا) له نړۍ غوښتي چې په افغانستان کې د بېوزلۍ د کچې ټیټېدو لپاره خپل ملاتړ زیات کړي.
پر دې سربېره د یونیسف په ګډون د یاد سازمان ځینو ادارو هم په خپلو وروسوتو راپورونو کې د افغانستان اقتصادي وضعیت نازک ښودلی دی.
