کابل ټيليګراف (سلواغې دویمه– ۱۴۰۳ لمريز)
د ملګرو ملتونو د بشري چارو د همغږۍ دفتر په راتلونکي کال کې د اوبو د کمښت او سږ کال په ژمي کې د کم اورښت په اړه خبرداری ورکړی دی.
د ملګرو ملتونو د بشري مرستو همغږۍ ادارې (اوچا) په یوه راپور کې ویلي چې تمه کیږي د افغانستان په ډیری سیمو کې به د ژمي په موسم کې له نورمال څخه ټیټ باران وشي.
دا سازمان وايي چې د دوه زره پنځه ویشتم کال تر پسرلي پورې به د تودوخې لوړه کچه په افغانستان کې د اوبو د کمښت خطر لا پسې زیات کړي، چې د حاصلاتو او د څړځایونو د زیان لامل به شي.
افغانستان د اقلیم د بدلون په وړاندې یو له خورا زیان منونکو هیوادونو څخه ګڼل کیږي، چې په وروستیو کلونو کې یې پرله پسې وچکالۍ، سیلابونه او د کورونو او کرنیزو ځمکو ویجاړیدل تجربه کړي دي.
د اوبو کمښت نه یوازې په افغانستان کې د کرنې په سکتور کې یوه جدي ستونزه ده، بلکې د څښاک پاکو اوبو ته د لاسرسي نشتوالی هم په دې هیواد کې یوه لویه ستونزه ګڼل کیږي.
