د کابل – جلال اباد لویې لارې د دوهم لین سړک د جوړولو چارې د ننګرهار په خوږياڼو ولسوالۍ کې وشوې.
د طالبانو د ریاست الوزرا اقتصادي مرستیال ملا عبدالغني برادر وويل چې دغه سړک به د کابل – جلال اباد پر لویه لاره د تلوونکو موټرو د حق العبور په پیسو جوړ شي.
هغه زباته کړه،د کابل – جلال اباد دویم لین سړک چې ۱۲۶ کیلومټره اوږدوالی لري، د کابل بګرامیو ولسوالۍ څخه پيل، د کابل خاک جبار ولسوالۍ، د ننګرهار ولایت حصارک، خوږياڼو او سرخرود ولسواليو څخه تر تېرېدو وروسته د جلال اباد حوزوي سړک سره نښلول کېږي.
ملا برادر د دې لارې ارزښت ته په اشارې سره وویل، د کابل – جلال اباد لویې لارې د دوهم لین سړک په جوړېدو سره به د دې لارې پر لومړي لین سړک ګڼه ګوڼه راکمه او د ترافیکي پېښو کچه به راټیټه شي. همدارنګه به د تګ راتګ اسانتیاوې برابرې، د سوداګریزو توکو د لېږد بهیر به ګړندی، خوندي او کم لګښته شي او همدا راز به د لارې په اوږدو کې کوچني او منځني کاروبارونه وغوړیږي.
