د مکسیکو چارواکي وايي، د دغه هېواد په شمال کې د یوې لارۍ او بس موټر د ټکر په نتیجه کې لږترلږه ۱۹ کسان مړه شوي او ۶ نور ژوبل شوي دي.
د مکسیکو چارواکو د پېښې په لومړیو کې د مړو شمېر ۲۴ یاد کړی و.
د زاکاتکاس ایالت چارواکو په یوه اعلامیه کې ویلي، د ژغورونکو او متخصصانو له هڅو وروسته د مړو تایید شوی شمېر ۱۹ دی او شپږ کسان په روغتونو کې تداوي کېږي.
پېښه د زاکاتکاس پر لویه لار داسې مهال وشوه چې د لارۍ موټر یو کانټینر چپه شو او هغه مسافروړونکی بس ورسره وجنګېد چې ۲۵ مسافر په کې وو.
