په ایران کې د بشري حقونو سازمان(هنګاو) خبر ورکړی چې، په ایران کې د دوو افغانانو په ګډون ۹ کسان اعدام شوي دي.
یاد سازمان د یوه راپور په خپرولو سره ویلي چې، د عبدالله تاجیک او د عبدالمهدي رشاد امیري په نامه دوه افغان وګړي د مخدره موادو د قاچاق په تور د ایران په (کرج او قم مرکزي) زندانونو کې اعدام شوي دي.
په همدې حال ایران کې د بشري حقونو یو بل سازمان(حالوش)هم د یادو کسانو اعدامول تائید کړي او زیاته کړې یې ده چې د روان ۲۰۲۴ زیږدیز کال د پیل راهیسې په دغه هیواد کې ۶۳ افغانان د بېلابېلو جرمونو په تور د ایران حکومت اعدام کړي دي.
په ایران کې دغه دوه افغانان داسې مهال عدامیږي چې، څو اوونۍ وړاندې د ايران هېواد عدليې وزارت يو پلاوی کابل ته راغلی وو او دلته يې له طالب چارواکو سره ايران کې د افغان بنديانو د وضعیت او افغانستان ته د لېږد په تړاو خبرې کړې وې.
ایراني پلاوي ژمنه کړې وه چې، افغانستان ته به پنځه سوه زندانیان چې ايران کې بندیان دي واستوي.
