( کابل ټيليګراف (سلواغې ۲۷– ۱۴۰۳ لمريزکال )
امریکایي خبري سرچینو اعلان وکړ چې چین او امریکا د افغانستان په اړه د پریکړې د وړاندې کولو په اړه په شخړه کې دي.
یوې امریکایي ادارې راپور ورکړی چې د امنیت شورا ته د افغانستان په اړه د پریکړه لیک د مسودې د سپارلو په اړه د واشنګټن او بیجینګ ترمنځ جدي کړکیچونه رامینځته شوي دي.
دې ادارې زیاته کړه چې که څه هم دا بحث د ۲۰۲۴ کال په وروستیو کې پیل شو، خو د ټرمپ د نوي ادارې واک ته له رسیدو سره یې شدت موندلی دی.
د دغه ارګان په وینا، دا کړکېچونه اوس نه یوازې په کابل کې له طالبانو سره د ملګرو ملتونو د تعامل پر څرنګوالي اغیزه کوي، بلکې کولی شي په امنیت شورا کې د مخکښ ځواک په توګه د چین دریځ پیاوړی یا کمزوری کړي.
په افغانستان کې د طالبانو له واک ته رسېدو وروسته، چین له دغه هېواد سره د ښکېلتیا او د هغې د ستونزو د حل غوښتنه کړې ده.
دا په داسې حال کې ده چې د ملګرو ملتونو د امنیت شورا په غونډه کې چې د ۲۰۲۵ کال په فبروري کې جوړه شوې وه، په ملګرو ملتو کې د چین سفیر او دایمي استازي فو کونګ د افغانستان د امنیت او پر ګاونډیو هیوادونو یې د اغیزو په اړه جدي اندیښنې راپورته کړې.
هغه ټینګار وکړ چې ترهګرې ډلې نه یوازې د افغانستان امنیت ګواښي، بلکې د سیمې سوله او امنیت هم اغیزمنوي.
فو کونګ د افغانستان له سرپرست حکومت څخه وغوښتل چې له ترهګرو ډلو سره په جدي توګه مبارزه وکړي او د شانګهای د همکارۍ سازمان او منځنۍ اسیا له غړو هیوادونو څخه یې وغوښتل چې له افغانستان سره خپلې همکارۍ زیاتې کړي ترڅو په ګډه د امنیتي ننګونو سره مقابله وکړي.
