کابل ټیلیګراف – ۱۸ وری ۱۴۰۴ لمریز کال
هرات کې د طالبانو د والي دفتر په یوې خبرپاڼه کې ویلي، چې د دغه ولایت ۹۶ سلنه زعفران بهرنیو هېوادونو ته صادرېږي.
د یاد دفتر د خبرپاڼې لهمخې د دغه ولایت زعفران د عمان، هند او یو شمېر عربي هېوادونو په ګډون بېلا بېلو هېوادونو ته صادرېږي.
خبرپاڼه کې راغلي، چې یاد ولایت کې د زعفرانو کښت شاوخوا ۹ زره هکټاره ځمکې ته رسېږي.
هرات ولایت د افغانستان په لوېدیځ کې موقعیت لري او د زعفرانو د کښت، تولید او صادراتو له اړخه یو له مخکښو ولایتونو څخه ګڼل کېږي. زعفران چې د “سرو زرو” په نوم هم یادېږي، د نړۍ له ګرانبهاو کرنیزو محصولاتو څخه شمېرل کېږي. دغه نبات زیاتره په وچ اقلیم کې وده کوي، او د هرات اقلیم ورته ډېر مناسب بلل کېږي.
د طالبانو د بیا واکمنېدو وروسته، د افغانستان د زعفرانو صادراتو ته یو ځل بیا تمرکز شوی، ځکه چې دا محصول لږ لګښت لري خو لوړ ارزښت لري. په تېرو کلونو کې افغانستان د زعفرانو د تولید له اړخه د نړۍ د مخکښو هېوادونو په ډله کې شامل شوی و، او د ایران له جدي سیالانو څخه ګڼل کېده.
سره له دې چې د نړیوالو بندیزونو، مالي محدودیتونو او د بانکدارۍ ستونزو له امله د صادراتو بهیر ځینې خنډونه لیدلي، خو بیا هم د زعفرانو صادراتو ته هڅې روانې دي. هرات کې د زعفرانو کښت د کروندګرو لپاره یو مهم عایداتي سرچینه ده، چې د ناامنۍ، کښت بدلون او وچکالۍ سره سره یې تولید نسبتاً باثبات پاتې شوی.
د کرنې د متخصصینو په وینا، که چېرې زعفران په معیاري ډول پروسس او بستهبندي شي، نو کولای شي د افغانستان د صادراتو ارزښت ډېر لوړ کړي او د بزګرانو اقتصادي وضعیت ښه کړي.
