کابل ټیلیګراف – ۲۶ وری ۱۴۰۴ لمریز کال
د طالبانو د کډوالو او راستنېدونکو چارو وزارت وایي چې ۹۶ تنه افغان کډوال د پاکستان له زندانونو خوشې او هېواد ته راستانه شول.
د کډوالو وزارت خبرپاڼه کې راغلي چې یاد شمېر افغان کډوال تېره ورځ هېواد ته راستانه شول.
سرچینې د کندهار د سپینبولدک د سرحدي امریت له قوله لیکلي چې یاد کسان د پاکستان په بېلابېلو سیمو کې نیول شوي وو او له یوې تر پنځو ورځو بندیان وو.
دا په داسې حال کې ده چې روانه اونۍ کې سلګونه افغانان د پاکستان له زندانونو خوشې شوي دي.
پاکستان د افغان کډوالو د جبري راستنولو دوېیمه لړۍ پیل کړې او هره ورځ لسګونه کورنۍ افغانستان ته راستنوي.
تېره ورځ د طالبانو د بهرنیو چارو سرپرست وزیر مولوي امیرخان متقي هم په کابل کې د پاکستان له سفیر په لېدنه کې د افغان کډوالو سره په نامناسب چلند خواشیني ښودلې وه او غوښتنه یې کړې چې پاکستان دې په دې اړه خپل چلند بدل کړي.
