کابل ټیلیګراف – ۱۶ غویی ۱۴۰۴ لمریز کال
د هند او پاکستان ترمنځ د کړکېچونو په زیاتېدو، د پاکستان د دفاع وزیر خواجه محمد آصف خبرداری ورکړ چې هند ممکن هره شیبه د سرحدي کنټرول کرښې په اوږدو کې پوځي برید وکړي.
آصف ټینګار وکړ چې پاکستان چمتو دی چې دې اقدام ته مناسب ځواب ووايي.
هغه د پاکستان له لومړي وزیر شهباز شریف څخه وغوښتل چې د پاهلګام وروستي برید په اړه د څېړنو لپاره یو نړیوال کمېسیون جوړ کړي او زیاته یې کړه چې دا ډول څېړنې کولای شي د هند د ادعاوو تر شا حقیقت روښانه کړي.
د پاکستان د دفاع وزیر د هند لومړي وزیر نارندرا مودي تورن کړ چې د سیاسي ګټو لپاره په سیمه کې سوله له خطر سره مخ کوي او ویې ویل چې دا اقدامات ممکن سیمه د اټمي جګړې تر بریده ورسوي.
هغه همداراز په خیبرپښتونخوا او بلوچستان کې د وروستیو ترهګریزو فعالیتونو او د هند له خوا د دې ډلو ملاتړ ته اشاره وکړه.
