کابل ټیلیګراف – ۱۱ چنګاښ ۱۴۰۴ لمریز کال
د طالبانو والي محمد ايوب خالد په بدخشان کې د خاش ولسوالۍ پر لاریون کوونکو د ډزو تاييد کړی دی.
هغه د بي بي سي پښتو سره په خبرو کې ويلي چې د طالبانو ځواکونو د لاریون د تيت پرک کولو لپاره د اوښکې بهوونکي ګاز او اوبو پاشلو وسايل نه درلودل او په همدې موخه یې ډزې کړي دي.
د را پورونو له مخې؛ په دغه ډزو کې د ښځو په ګډون یو شمېر کسان ټپیان شوي دي.
په بدخشان کې د طالبانو والي د مظاهره کوونکو د وژل کېدو په اړه په ضمني توګه تاييد کړی او ويلي يې دي چې ممکن ځينې کسان د پښو لاندې شوي وي يا پر مظاهره کوونکو د کورونو څخه چا ډزې کړې وي.
هغه پرته له دې چې د تلفاتو شمېر ورکړي تاييد کړې چې ممکن د طالبانو په ډزو کې چا ته زيان رسېدلی وي.
په بدخشان کې د طالبانو والي ويلي چې د خاش د خلکو مظاهرې کنټرول شوې او اوس حالات ارام دي.
د خاش اوسېدونکو مظاهرې د طالبانو پر وړاندې د خلکو د اعتراضونو نوې څپه ده.
