کابل ټیلیګراف – ۳۰چنګاښ ۱۴۰۴ لمریز کال
د طالبانو او پاکستان د کورنیو چارو وزیرانو د TTP پر وړاندې د مبارزې په اړه خبرې کړې.
د طالبانو د کورنیو چارو وزارت اعلان کړی چې سراج الدین حقاني له خپل پاکستاني سیال محسن نقوي سره د دوه اړخیزو اړیکو او امنیتي همکاريو په اړه خبرې کړي دي.
په ورته وخت کې، د پاکستان د کورنیو چارو وزارت ویلي چې په دې لیدنه کې د تحریک طالبان پاکستان (TTP) پر وړاندې د مبارزې او د سرحدي سیمو د مدیریت په اړه بحث شوی دی.
د طالبانو د کورنیو چارو وزارت د یکشنبې په ورځ (د جولایي ۲۹) اعلان وکړ چې په دې لیدنه کې دواړو لورو د دوه اړخیزو اړیکو د پیاوړتیا، امنیتي همکاريو، د نشه يي توکو پر وړاندې مبارزې، د مهاجرینو وضعیت او سوداګریزو اړیکو د اسانتیا په اړه خبرې کړي دي.
د طالبانو په اعلامیه کې د پاکستان له خوا د تحریک طالبان پاکستان په اړه د غوښتنې یادونه نه ده شوې، هغه ډله چې طالبان د هغې د جنګیالیو په افغانستان کې شتون ردوي.
سراج الدین حقاني په دې لیدنه کې ویلي چې د باور فضا رامنځته کول کولای شي موجوده ستونزې حل کړي.
هغه زیاته کړه: «افغانستان او پاکستان دوه ګاونډي اسلامي هیوادونه دي چې ګڼ مشترکات لري او باید خپلې اړیکې د همکارۍ پر بنسټ پیاوړې کړي.»
د طالبانو د اعلامیې له مخې، سراج الدین حقاني د مهاجرینو او بندي افغانانو سره د مناسب چلند او د دوی لپاره د اسانتیاوو د برابرولو غوښتنه کړې ده.
د اعلامیې له مخې، د پاکستان د کورنیو چارو وزیر هم د امنیتي همکاريو، د نشه يي توکو پر وړاندې مبارزې او د سوداګرو او اتباعو لپاره د اسانتیاوو پر برابرولو ټینګار کړی دی.
خو د پاکستان د کورنیو چارو وزارت اعلان کړی چې محسن نقوي له سراج الدین حقاني سره د ترهګرۍ پر وړاندې د مبارزې، په ځانګړې توګه د تحریک طالبان پاکستان، د دواړو هیوادونو د سرحدونو د اغیزمن مدیریت، د نشه يي توکو او پاکستان ته د تګ راتګ په اړه خبرې کړي دي.
دواړو لورو د پاکستان د کورنیو چارو وزیر محسن نقوي کابل ته سفر د اړیکو د پراخولو او عملي همکاريو د زیاتولو لپاره مهم بللی دی.
