کابل ټيلیګراف – ۲۹ زمری ۱۴۰۴ لمریز کال
په امریکا کې د بندیز د وېرې او جنجالي قانون سره سره، سپینې ماڼۍ په رسمي توګه پر ټیک ټاک خپل اکاونټ جوړ کړ.
دا اقدام په داسې وخت کې ترسره کیږي، چې د دې اپلیکیشن مالکه کمپنۍ بائټ ډانس دې ته اړ ده چې یا دا اپلیکیشن یوه امریکايي پېرونکي باندې وپلوري او یا په امریکا کې په دې اپلکېشن بندیز ولګیږي.
د امریکا ولسمشر ډونالډ ټرمپ د دې قانون وروستۍ نېټه څو ځله وغځوله او اوس نوی وروستی نېټه د سپټمبر ۱۷ ټاکل شوې ده.
د سپینې ماڼۍ د ټیک ټاک په اکاونټ لومړنی پوسټ کې د ټرمپ وینا خپره شوې، چې په کې وایي، “زه ژمنه کوم چې د دې ملت خلکو لپاره به غوره ژوند برابر کړم، زه ستاسو غږ یم.”
د پوسټ په سرلیک کې لیکل شوي: “امریکا! موږ بېرته راغلو، ټیک ټاک څه حال دی؟”
دا د امریکايي ادارې لومړی رسمي ټیک ټاک اکاونټ دی، که څه هم ولسمشر ټرمپ او پخواني ولسمشر جو بایډن دواړو د ۲۰۲۴ کال ټاکنیزې کمپاین پر مهال ټیک ټاک کارولی و.
په زړه پورې خبره دا ده چې دواړه مشرانو له دې مخکې څو ځله دا اپلیکیشن د امریکايي امنیت لپاره خطر بللی و.
