کابل ټیلیګراف – ۲ وږی ۱۴۰۴ لمریزی کال
اتحادیې اروپا د افغان ماشومانو د ملاتړ لپاره یونیسف سره د ۱۰ میلیونه یورو مرسته کوي.
د ملګرو ملتونو د ماشومانو د ملاتړ صندوق (یونیسف) اعلان کړی دی چې اتحادیې اروپا، په ځانګړي توګه د افغان ماشومانو، په تېره بیا د راستنېدونکو ماشومانو د ملاتړ لپاره، دې ادارې سره د ۱۰ میلیونه یورو مرسته کوي.
یونیسف په یوه اعلامیه کې زیاته کړې چې دا مالي مرسته به د افغانستان په پولو کې د بېسرپرسته ماشومانو د سمدستي خوندیتوب او همدارنګه د هېواد په ۱۲ ولایتونو کې د بیا یوځای کولو پروګرامونو د ملاتړ لپاره وکارول شي.
د دې اعلامیې له مخې، د دې مرستو په کارولو سره به ۱۸۰ زره ماشومانو او کورنیو ته د کورنۍ موندنې، بیا یوځای کولو، لنډمهاله ملاتړ او رواني-ټولنیزو خدمتونو په برخو کې مرسته ورسول شي.
