کابل ټیلیګراف ۷وږی ۱۴۰۴ لمریز کال
د روسیې د امنیت شورا سلاکار، سرګي شویګو وایي چې په افغانستان کې د نشهيي توکو تولید کم شوی، خو په وینا یې چې له دغه هېواده د نشه يي توکو د تولید وضعیت لا هم پېچلی دی.
سرګئي شویګو زیاته کړې چې دا مهال په افغانستان کې د نشهيي توکو پر وړاندې ښه مبارزه شوې، خو وايي له افغانستانه د نشهيي توکو د قاچاق په برخه کې اندېښنې شته.
د روسي رسنیو د راپورونو له مخې چې سرګي شویګو په افغانستان کې د نشهيي توکو پر وړاندې روانه مبارزه ستایلې ده.
د روسیې د امنیت شورا سلاکار همداراز ویلي چې افغانستان او ګاونډیو هېوادونو کې د مېتامفیتامینو د نیونو کچه ۷۵ سلنه لوړه شوې ده.
بل لورته طالبانو بیا په وار وار ویلي چې په افغانستان کې د نشهيي توکو د تولید، قاچاق او کارونې پر وړاندې جدي مبارزه شوې او په دې برخه کې روان وضعیت صفر ته ټیټ شوی دی.
تر دې مخکې یو شمېر نورو هېوادونو هم له افغانستانه د نشهيي توکو د قاچاق پر زیاتوالي اندېښنه ښودلې وه او په دې برخه کې یې د هېوادونو پر ګډې مبارزې ټینګار کړی و.
