کابل ټیلیګراف ۷وږی ۱۴۰۴ لمریز کال
د بلغاریا پولیسو د ۲۴ افغان پناه غوښتونکو د نیول کېدو خبر ورکړی چې د ترکیې پولې ته څېرمه په یوه لارۍ کې انتقالېدل. چارواکي وایي، دغو کسانو د اروپا نورو هیوادونو ته د تېرېدو لپاره قاچاقبرو ته زرګونه یورو ورکړي وو او د سختې ستړیا ترڅنګ په بد جسمي وضعیت کې ول.
د راپورونو له مخې، ډېری پناه غوښتونکي د اوبو له کمښت او بېحالۍ سره مخ وو چې له لومړنیو طبي پاملرنو وروسته د اصلي کډوالو مرکز ته ولېږدول شول.
د بلغاریا رسمي خبري اژانس خبر ورکړی چې موټر چلوونکي د پولیسو د درېدو امر ته پام ونه کړ، موټر یې له کنټروله ووت، له څو پارک شویو موټرو سره ټکر شو او بیا یې د تښتېدو هڅه وکړه، خو پولیسو هغه له یوه بل کس سره، چې د ده همکار وو، او دواړه د بلغاریا اوسېدونکي دي، ونیول.
د یو افغان پناه غوښتونکي په وینا، هر کس له ترکیې څخه بلغاریا ته د ناقانونه لېږد لپاره قاچاقبرو ته شاوخوا څلور زره یورو ورکړي وو.
بلغاریا له ترکیې سره د ګډې پولې له امله د اروپايي اتحادیې هیوادونو ته د افغانانو او د منځني ختیځ د پناه غوښتونکو لپاره د ننوتلو یوه مهمه لار شمېرل کېږي.
سره له دې چې د صوفیې حکومت د سرحدي امنیت د پیاوړتیا او له ګاونډیو هېوادونو سره د همکارۍ هڅې زیاتې کړي، د انساني قاچاق لارې لا هم فعاله دي.
