کابل ټیلیګراف ۸وږی ۱۴۰۴ لمریز کال
د ختیځ زون یو شمېر سیمو کې نن د ماشومانو د ګوزڼ یا پولیو ضد زرقي واکسین کمپاین پیل شو.
له پولیو خلاص افغانستان بنسټ نن (شنبه، سنبله ۸) ویلي، د ماشومانو د ګوزڼ یا پولیو ضد واکسین دغه کمپاین د ننګرهار په جلالاباد ښار او سرهرود، بهسود، خوګیاڼي او بټيکوټ ولسوالیو، د لغمان مهترلام ښار او د کونړ اسعدآباد ښار کې پیل شو.
یاد بنسټ ویلي چې په دغه کمپاین کې باید ټول هغه ماشومان چې له ۴ تر ۵۹ میاشتو عمر لري، د پولیو دواړه ډوله واکسینونه زرقي او څاڅکي ترلاسه کړي.
د مسوولینو په وینا، له زېږون تر ۴ میاشتو پورې ماشومانو ته یوازې د څاڅکو واکسین ورکول کېږي او زیاتوي، چې دا دواړه واکسینونه د ماشومانو د بدن دفاعي سیستم پیاوړی کوي او د فلج د خپرېدو مخه نیسي.
له پولیو د خلاص افغانستان بنسټ، د هغو ماشومانو شمېر په اړه څه نهدي ویلي چې، په دې پړاو کې به واکسین شي.
پاکستان او افغانستان د نړۍ دوه هغه هېوادونه دي چې اوس یې هم ماشومان د پولیو د لاعلاجه ناروغۍ له ګواښ سره مخ دي، خو پآکستان بیا یو له هغو هېوادونو دی چې هرکال په کې په لسګونه د پولیو تازه مثبتې پېښې ثبتېږي.
