امریکا د فلسطین د ولسمشر ویزه رد کړه
د امریکا متحده ایالاتو اعلان وکړ، چې د فلسطین ولسمشر، محمود عباس ته به اجازه ورنه کړي، چې په نیویارک کې د ملګرو ملتونو کلنۍ غونډه کې ګډون وکړي.
د امریکا د بهرنیو چارو وزارت ویلي، د محمود عباس ترڅنګ شاوخوا ۸۰ نور فلسطیني چارواکي هم له دې پرېکړې اغېزمن شوي او د هغوی ویزې رد او لغوه شوې دي.
د ملګرو ملتونو کلنۍ غونډه په راتلونکې سپټمبر میاشت کې جوړېږي، چې ټاکل شوې د امریکا یو شمېر اروپايي متحدین د فلسطین دولت په رسمیت وپېژني.
نیویارک کې د ملګرو ملتونو دا کلنۍ ناسته د فرانسې او سعودي عربستان په کوربه توب جوړېږي، چې ټاکل شوې، فرانسه، برتانیا، استرالیا او کاناډا به فلسطین په رسمیت وپېژني.
د محمد عباس دفتر د امریکا دا پرېکړه حیرانوونکې بللې او ویلي یې دي، چې دا د ملګرو ملتونو د مرکزي دفتر د تړون خلاف عمل دی.
د ملګرو ملتونو د ۱۹۴۷م تړون له مخې امریکا مکلفیت لري، چې د بهرنیو ډيپلوماټانو لپاره د ملګرو ملتونو دفتر ته د تګ ویزې ورکړي، خو وايي د امنیتي او بهرني سیاست د اندېښنو له امله یې ردولی شي.
اسراییل د امریکا د دغې پرېکړه هرکلی کړی. واشنګټن او تل ابيب د هغو متحدینو له ژمنو ناخوښ دي چې پلان لري راتلونکې میاشت ملګرو ملتونو کې د فلسطین دولت په رسمیت وپېژني.
د امریکا د بهرنیو چارو وزارت په څرګندونو کې ویلي، فلسطینۍ ادارې د افراطیت پر وړاندې لازم دریځ نه دی خپل کړی او د فلسطین د یو اړخیز دولت د رسمیت پېژندنې هڅې کوي.
فلسطین دا تورونه رد کړي. د ملګرو ملتونو ویاند ویلي، چې امریکا سره د ویزې پر موضوع خبرې وکړي.
تراوسه د ملګرو ملتونو له ۱۹۳ غړو هېوادونو لږ تر لږه ۱۴۷ هېوادونه د فلسطین دولت په رسمیت پېژندلی دی. فلسطین اوس مهال په ملګرو ملتونو کې د “ناظر” په توګه غړیتوب لري.
د یادونې وړ ده چې امریکا په ۱۹۸۸ کې هم د فلسطین د آزادۍ سازمان مشر، یاسر عرفات ته ویزه ورنه کړه او هغه مهال د ملګرو ملتونو غونډه د نیویارک پر ځای جنیوا کې وشوه څو عرفات وکولای شي وینا وکړي.
