کابل ټیلیګراف – ۸ وری ۱۴۰۴ لمریز کال
په کابل کې ځینې کسان د طالبانو تر کنټرول لاندې په دولتي ادارو کې د کارونو له خنډ او ځنډ څخه سر ټکوي او وایي چې په ځینو ادارو کې د ټولو اصولو خلاف رسمیات ناوخت پیلېږي، چارې یې پر وخت نه ترسره کېږي او د دغه ډول کړنو مخه دې ونیول شي.
اوس مهال په دولتي ادارو کې ډېری کسان د طالبانو له لوري د مسلکي زده کړو خلاف مقرر شوي او له کار سره نابلدتیا بله هغه ستونزه ده چې خلک ترې سر ټکوي.
خلک څه وایي؟
د تعلیماتو او مسلکي زده کړو معینیت ته تللي یوه کس کابل ټیلیګراف ته وویل چې دی نن (شنبې د وری اتمه) د یو سند ترلاسه کولو په موخه ورغلی و خو هلته رسمیات په لس کم پنځلس بجې پیل شوي دي.
ده وویل: «په ټوله معینیت کې چوپه چوپتیا وه او یوازې یو کس حاضر و چې مخابره یې په لاس کې وه او چاته یې اجازه نه ورکوله چې دننه ورشي، موږ ته یې ویل چې جلسه ده، انتظار وکړئ، او ټول له یوې مخې جلسې ته تللي دي، چې کله جلسه خلاصه شوه بیا به تاسو ته اجازه درکړل شي.»
ده وایي، لس کم پنځلس بجې هلته رسمیات پیل شول او بیا یوه یوه کس ته د ننوتلو اجازه ورکړل شوه.
دی وایي چې په هېڅ نظام او هېڅ وخت کې یې نه دي لیدلي چې د یوې ادارې ټول کارکوونکي دې په یوه وار جلسې ته ولاړ شي او لسګونه کسان دې د دروازو شاته انتظار وباسي.
هغه دغه راز وایي چې رسمي جلسې باید لنډې او په مناسب وخت کې ونیول شي او د خلکو د کار د ځنډ لامل نه شي.
یو بل کس چې د احصایې او معلوماتو ملي ادارې ته یې مراجعه کړې، هم وایي چې د یادې ادارې د کارکوونکو له لوري یې مورنۍ ژبه غلطه ثبت شوې او له ده یې په اړه هېڅ پوښتنه نه ده کړې.
دی وایي: «دا خلک نوي طالبانو مقرر کړي، په کار نه پوهېږي، بس خلکو ته لانجې جوړوي. زه پښتون یم، زما د مور ژبه یې هزارهګي لیکلې ده، اوس یوه اونۍ کېږي پسې ګرځم، نه اصلاح کېږي، کله یوې خوا منډه کړه، کله بلې خوا.»
هغه زیاتوي که چېرې کار اهل کار ته وسپارل شي نو هېڅکله به هم خلکو ته ورته ستونزې پیدا نه شي.
د طالبانو د کانونو او پټرولیم وزارت ته یو بل تللی کس هم وایي چې د یوه کان په اړه یې دغه وزارت ته مراجعه کړې خو د یوې اونۍ په تېرېدو نه د اړوندې برخې د رئیس په لیدو بریالی شو او نه یې هم عرض پاڼه احکام شوې ده.
هغه زیاتوي چې هر کله راغلی دی، یا رئیس په غونډه کې وي او یا له وزارت څخه بهر تللی وي.
ده وایي: «هسې غولول او چل دی، بس په دې او په هغه دې غولوي. د خلکو کارونو کې باید خنډ رانه شي، مراجعین دې نه ځورول کېږي، پر وخت او ژر باید د هر چا کار خلاص شي.»
دا په داسې حال کې ده چې د طالبانو مشر په وار وار په خپلو خبرو کې ټینګار کړی دی چې خلکو ته دې اسانتیاوې رامنځته شي.
