کابل ټیلیګراف د وږي ۲۰مه ۱۴۰۴ لمریز کال
د خیبر پښتونخوا ایالتي اعلی وزیر علي امین خان ګنداپور، اعلان کړی چې د هغه پاسپورت د ۲۰۲۳ کال د مې له ۹مې نیټې لغوه شوی او له همدې امله نشي کولی افغانستان ته د سولې خبرو لپاره سفر وکړي.
هغه زیاته کړه چې د پاسپورت د نوي کولو هڅه یې کړې، خو پاکستاني چارواکو دا کار منع کړی دی.
ګنداپور وویل چې د امارت اسلامي سره د سولې او امنیت په اړه خبرې کول غواړي، خو دا ډول خبرې د ایالتي حکومت له صلاحیت بهر دي او د ملي کچې موضوع ده.
دا څرګندونې وروسته له هغې وشوې، کله چې د تحریک انصاف ګوند مشر عمران خان له ګنداپور وغوښتل چې افغانستان ته سفر وکړي او د ګډو مسایلو او امنیت په اړه خبرې وکړي.
ګنداپور وویل، که عمران خان امر وکړي چې پرته له ویزې افغانستان ته لاړ شي، هغه به دا کار وکړي.
د خیبر پښتونخوا د ایالتي حکومت ویاند وايي چې دا موضوع د پاکستان د بهرنیو چارو وزارت سره اړیکه لري او تر اوسه د پاسپورت په اړه کوم پرمختګ نه دی شوی.
