د طالبانو ویاند، د زمري ۲۸ مې په مناسبت مبارکي ویلي او زیاته کړې یې ده چې د افغانانو مبارزې نه یوازې افغانستان کې د ښکېلاک د ماتې لامل شوه، بلکې د سیمې او نړۍ په سطحه یې ملکونو کې ښکېلاک له ماتې سره مخ کړ.
نن یکشنبه (د زمري۲۸مه) له انګرېزانو څخه د هېواد د خپلواکۍ بېرته اخیستو له ورځې سره برابره ده او امانالله خان په دغه ورځ د افغانستان خپلواکي رسماً اعلان کړه.
د طالبانو ویاند ذبیحالله مجاهد په همدې تړاو په یوه خپره شوې اعلامیه کې لیکلی، یو سل او پنځه کاله مخکې افغانانو د علمای کرامو په فتوی او د هغوی تر رهبرۍ لاندې د انګریزي ښکېلاک پر وړاندې جهادي مبارزه وکړه او په پر له پسې توګه یې انګرېزان مات کړل او له خپلې خاورې یې وشړل.
اعلامیه کې راغلي: «د بریتانوي استعمار پر وړاندې زموږ د مجاهدو اسلافو نه ستړې کېدونکې جهادي مبارزه نه یوازې افغانستان کې د ښکېلاک د ماتې لامل شوه بلکې د سیمې او نړۍ په سطحه یې په ټولو اشغال شوو او استعمارځپلو ملکونو کې ښکېلاک له ماتې سره مخامخ کړ.»
هغه لیکلي، چې افغانان د خپلو نیکونو په پیروۍ یوه پېړۍ وروسته هم «د فتحې را وستلو» او اشغال ختمولو روحیه لري.
