د طالبانو د اوبو او برېښنا وزارت وایي، د یوه هندي شرکت مسؤلینو د دغه وزارت له سرپرست سره په لېدنه کې په افغانستان کې د برېښنا د تولید په پروژو کې پانګونې ته لېوالتیا ښودلې ده.
د افغانستان د اوبو او انرژي وزارت په خبرپاڼه کې راغلي چې د دغه وزارت سرپرست ملا عبداللطیف منصور د نجیب سلیمان په نوم د یوه هندي شرکت شرکت له مرستیال منور لال سره وکتل او د برېښنا د تولید په اړه یې خبرې وکړې.
سرچېنې لیکلي چې په دغه لېدنه کې د یاد شرکت مرستایل ویلي، چمتو دي چې په افغانستان کې د برېښنا انرژي د تولید په پروژو کې پانګونه وکړي.
خبرپاڼه کې راغلي، د اوبو او انرژي سرپرست وزیر د نوموړي د پانګونې د هرکلي ترڅنګ یادونه وکړه، چې اوسمهال له هره پلوه په افغانستان کې د پانګونې لپاره زمینه چمتو ده.
منصور ټينګار کړی چې د اړینو همغږیو د رامنځته کولو لپاره غوره ده، د وزارت او د نوموړي شرکت تخنیکي ټیمونه د پانګونې د څرنګوالي او د پروژې د ځای د ټاکلو په هکله هوکړې ته ورسيږي؛ ترڅو د پروژې د اغېزمنتوب څخه ډاډ تر لاسه او د پلي کولو زمینه چمتو شي.
