کابل ټیلیګراف – ۱۴ وری ۱۴۰۴ لمریز کال
سي ان ان په یوه مقاله کې لیکلي چې طالبانو له امریکایي پلاوي سره د جورج ګلزمن د خوشې کولو په موخه د تېرې مارچ میاشتې په لیدنه کې له واشنګټن غوښتي چې د دوی د حکومت په توګه په رسمیت و پېژني.
د دې مقالې له مخې، طالبانو دغه راز امریکا کې افغانانو ته د کونسلي خدمتونو د وړاندې کولو په موخه د یوه دفتر د پرانیستو غوښتنه هم کړې ده.
سي ان ان لیکلي چې طالبانو د ډانلډ ټرمپ تر بیا واکمنۍ راهیسې له دغه هېواد سره د ښو اړیکو په هڅه کې دی.
دغه مقاله کې د اسلامي امارت د کورنیو چارو وزارت پر سرپرست خلیفه سراج الدین حقاني او دوو نورو غړو د جایزو لغوه کېدو ته اشاره شوې، چې امریکا هم دغه برخه کې ګامونه پورته کړي او که اسلامي امارت د ډیپلوماسۍ په لور نور ګامونه هم پورته کړي، کولای شي په واشنګټن کې خپل سفارت پرانیزي.
دغه مقاله کې د طالبانو او امریکایي پلاوي ترمنځ د لیدنې له جزییاتو د باخبرو سرچینو په حواله راغلي، چې امریکایي چارواکو طالبانو ته ویلي، “باید ګواښ ومنئ او فعال اوسئ” ځکه په خبره یې، “دغه چاره به ښو اړیکو ته لار هواره کړي.”
د ۲۰۲۱ کال د اګست له ۱۵ وروسته، چې طالبان بیا واک ته ورسېدل، د نړۍ له ډېری هېوادونو سره یې سیاسي اړیکې محدوده پاتې شوې. امریکا، چې د طالبانو حکومت یې لا هم په رسمیت نهدی پېژندلی، د افغانستان د بهرنیو اړیکو لپاره یو مهم لوبغاړی دی. طالبانو له ۲۰۲۱ کال راهیسې هڅه کړې، چې د دیپلوماسۍ له لارې د مشروعیت ترلاسه کولو لپاره ګامونه پورته کړي، خو د ښځو د حقونو، بشري وضعیت، او د افراطي ډلو پر ضد د اقداماتو په برخو کې د نړیوالو شرطونه نهدي پوره کړي.
