راپورونه وايي چې د سوریې د حکومت مخالفو وسله والو ډلو پرون تر حما وروسته حمس او ځينو نورو ښارونو کې ډېر پرمختګ کړی او د دمشق تر څنډو رسېدلي دي.
ځينو رسنيو رپوټونه ورکړي چې د سوریې حکومت د سقوط تر بریده رسېدله او له ډېرو ښارونو د بشار الاسد په مشرۍ حکومتي ځواکونه وتلي دي.
العربیه شبکې په یو راپور کې د سوریې د چارواکو له قوله ډاډ ورکړی چې بشار الاسد لا هم په دمشق کی دی خو د ولسمشرۍ په شاوخوا کې د ډزو غږونه اورېدل شوي دي.
له تېرو دوو اوونيو راهېسې په سوریه کې د تحریر الشام وسله والې ډلې په مشرۍ بېلابېلو ډلو د حکومت پر ضد جګړه پيل کړې او له تېرو څو ورځو راهېسې يې پرلپسې ځينې ښارونه نيولي دي.
