د طالبانو د عامې روغتیا وزارت وايي چې په روان زیږدیږ کال کې په ټول هېواد کې د پولیو یا ګوزڼ واکسین شپږ کمپاینونه ترسره شوي.
د دغه وزارت ویاند شرافت زمان امرخېل وايي چې، له دې منځه درې فرعي، دوه عمومي کمپاینونه او یو ځانګړی کمپاین ترسره شوی دی.
د پلازمېنې ځينې اوسېدونکي له عامې روغتیا وزارته غواړي چې، په هېواد کې د دې ناروغۍ پر وړاندې د مبارزې او د هغې د لهمنځه وړلو په برخه کې جدي هڅې وکړي. دوی وايي چې، د واکسیناسیون پر کمپاینونو سربېره، خلکو ته باید د پولیو واکسین د ګټو په اړه عامه پوهاوی هم ورکړل شي.
یوشمېر ډاکټران د دې ناروغۍ د لهمنځه وړلو لپاره د روغتیايي مرستندویو بنسټونو او کورنیو همکاري ګټوره ګڼي.
د عامې روغتیا وزارت د شمېرو له مخې، د روان زېږدیز کال له پیلېدو راهیسې په هېواد کې د دې ناروغۍ هېڅ مثبته پېښه نهده ثبت شوې.
