کابل ټيليګراف (د مرغومې ۱۵مه– ۱۴۰۳ لمريز)
ځایي سرچینې وایې چې د کابل-جلال اباد پر لویه لاره د کابل سروبي ولسوالۍ اړوند«نغلو»سیمه کې د طالبانو رنجر موټر یو ځوان وهلی او وژلی یې دی.
سرچینې زیاته کړې چې دغه پېښه نن غرمه مهال رامنځته شوې چې پرمهال یې د نادر خان په نامه یو ځوان خپل ژوند بایللی دی.
د سرچینې د مالوماتو له مخې یاده پېښه داسې مهال رامنځته شوې، چې د طالبانو یو رینجر موټر د زیات سرعت له کبله د موټر چلوونکي له کنترول وتلی او د سروبي ولسوالۍ په یاده سیمه کې یې د کبانو هوټلونو مخې یاد ځوان وهلی دی.
تراوسه طالب چارواکو په دې اړه رسنیو ته څه نه دي ویلي.
له دې څو ورځې وړاندې په لغمان کې هم د طالبانو یو رنجر موټر یو ماشوم وهلی او وژلی و.
له تېر حکومت پاتې نظامي رنجر موټرو سره د طالبانو نه بلدتیا، ګړندی تګ او د طالبانو نامسلکيتوب هغه لاملونه دي، چې له کبله یې ډیر کله دا ډول پېښې رامنځته کیږي.
