( کابل ټيليګراف (سلواغې شلمه – ۱۴۰۳ لمريز )
یونيسف د میدانوردګو ولایت د پوهنې له ریاست سره د څه باندې ۳۰۰ زره امریکایي ډالرو په ارزښت د درسي و اداري توکو مرسته کړې ده.
د میدانوردګو د پوهنې ریاست نن د یوې خبرپاڼې په خپرولو ویلي چې په دې مرسته کې ٢٥٢٨ کېټه درسي او ٣٩٥ کېټه اداري توکي شامل دي.
د سرچینې د معلوماتو له مخې، په یوه کېټ کې د شلو زدهکوونکو لپاره لس قلمه بېلابېل درسي توکي شامل دي.
خبرپاڼه کې راغلي چې دغه مرسته د ملګرو ملتونو د ماشومانو د ملاتړ صندوق کړې او ټول ارزښت یې ۳۰۵ زره او ۷۶۰ امریکایي ډالره کېږي.
د میدانوردګو د پوهنې رییس مولوي محمدعثمان حریت د یادې مرستې له امله مننه کړې او له اړوندو موسسو یې غوښتي چې د پوهنې برخه کې له دغه ولایت سره نورې مرستې هم وکړي.
