کابل ټیلیګراف – ۱۴ وری ۱۴۰۴ لمریز کال
د امریکا ولسمشر ډونالډ ټرمپ دغه هېواد ته پر ټولو وارداتي توکو له لس سلنې څخه تر ۵۰ سلنې تعرفه وضع کړه.
د سپینې ماڼۍ د معلوماتو له مخې، دغه تعرفه به سر له نن سهاره (پنجشنبه، د وري ۱۴مه) پلي شي.
هغه د بریتانیا پر صادراتي توکو تعرفه لس سلنې، د اروپايي ټولنې ۲۰ سلنې او د یو شمېر نورو بیا هېوادونو ان ۵۰ سلنې ته لوړه کړې ده.
ټرمپ دغه پرېکړه د امریکا د اقتصادي ودې لپاره اړینه بللې ده.
د امریکا ولسمشر تېره مارچ میاشت هم دغه هېواد ته پر واردېدونکو موټرو او پرزو ۲۵ سلنه تعرفه اعلان کړې وه.
د یادونې وړ ده چې کاناډا او مکسیکو، د متحده ایالاتو د-مکسیکو-کاناډا تړون (USMCA) له امله، له دغو نویو تعرفو څخه معاف دي. همدارنګه، هغه محصولات چې مخکې تر تعرفو لاندې راغلي، لکه موټرونه، فولاد، او المونیم، به د اضافي تعرفو تابع نه وي.
دا پالیسۍ د ټرمپ د ادارې د سوداګریزې اجنډا یوه مهمه برخه ده، چې موخه یې د امریکا د سوداګریز کسر کمول او د کورنیو تولیداتو ملاتړ دی.
