کابل ټیلیګراف – ۱۶ وری ۱۴۰۴ لمریز کال
د نړۍوالو اندېښنو سره سره د پاکستان کورنیو چارو وزارت تېره ورځ په دغه هېواد کې د افغان کډوالو د نیولو او جبري ایستلو لپاره پراخ عملیات پیل کړي دي.
ورتهمهال د ملګرو ملتونو سازمان کارپوهانو او افغانستان لپاره د دې سازمان د بشري حقونو شورا ځانګړي راپورورکوونکي ریچارډ بېنېټ له پاکستان څخه غوښتي، چې د افغان کډوالو د جبري ایستلو لړۍ ودروي.
پاکستان د تېرو درېیو کلونو راهیسې د ټولو نړیوالو او انساني اصولو خلاف سلګونه زره افغان کډوال له خپل هېواد په جبري ډول ایستلي دي.
پاکستان د افغان کډوالو کوربه هېواد ګڼل کېږي او د تېرو څلوېښتو کلونو راهیسې له افغانستانه د جګړو، ناامنیو او اقتصادي ستونزو له امله میلیونونه افغانان دغه هېواد ته کډه شوي دي. اوسمهال هم شاوخوا ۱.۷ میلیونه ثبت شوي او ګڼ شمېر غیر ثبت شوي افغان کډوال په پاکستان کې ژوند کوي.
له ۲۰۲۱ وروسته، د طالبانو له بیا واک ته رسېدو سره، د افغان کډوالو نوی موج پاکستان ته ورسېد، خو د دغه هېواد حکومت له هغه راهیسې پر افغان کډوالو فشارونه زیات کړي، چې پکې د ویزو تمدید ستونزې، نیونې، توقیف، زنداني کول، او حتی جبري ایستنې شاملې دي.
د ۲۰۲۳ په وروستیو کې پاکستان د “غیر قانوني مېشتو” بهرنیانو د ایستلو پالیسي اعلان کړه، چې له مخې یې لسګونه زره افغانان په زور له هېواده وشړل شول. دغه اقدامات د نړیوالو بشري بنسټونو، په ځانګړي ډول د ملګرو ملتونو کډوالو عالي کمېشنرۍ (UNHCR) او د بشري حقونو سازمانونو له پراخو نیوکو سره مخ شول.
د ملګرو ملتونو ځانګړي راپورورکوونکي، لکه ریچارډ بېنېټ، خبرداری ورکړی چې دا ډول جبري ایستنې نه یوازې د نړیوالو قوانینو، بلکې د بشري حقونو اصول هم نقضوي، او باید ودرول شي.
