کابل ټیلیګراف – ۱۶ وری ۱۴۰۴ لمریز کال
د امریکا د خزانې وزارت په روسیه کې مېشت دوه افغان سوداګر، هوشنګ او سهراب غیرت، د یمن د حوثیانو د مالي شبکې سره د همکارۍ په تور تحریم کړل.
دا دوه وروڼه تورن شوي چې د حوثیانو د مالي چارواکي سعید الجمل سره یې د وسلو او له اوکراین څخه غلا شویو غنمو په لېږدولو کې مرسته کړې ده.
د امریکا د خزانې وزارت د بهرنیو شتمنیو د کنټرول دفتر (OFAC) دا دوه افغان سوداګر، هوشنګ او سهراب غیرت، د حوثیانو د مالي او پوځي ملاتړ په یوه شبکه کې د فعال رول لرلو له امله په تور لېست کې اچولي دي.
د دې تحریمونو اعلان د ۲۰۲۵ کال د اپریل په لومړیو کې شوی، او ویل کېږي چې دا دواړه کسان د روسيې په مرکزیت کې فعالیت کوي.
د راپورونو له مخې، هوشنګ او سهراب غیرت د ۱۴۰۳ کال په اوړي او مني کې له کریمیا څخه غلا شویو غنمو کم از کم دوه محمولې یمن ته لېږدولې دي.
دا محمولې د یوې کښتۍ له لارې، چې د هانګ کانګ د یوې شرکت په مالکیت کې وه، انتقال شوې دي.
دوی د وسلو او حساسو توکو په لېږد کې هم د سعید الجمل سره همکاري کړې، چې د حوثیانو یو لوړپوړی مالي مسوول دی او پخوا هم د امریکا له خوا تحریم شوی دی.
هوشنګ او سهراب د غلامسخي غیرت زامن دي، چې پخوا په اندونیزیا او روسیې کې د افغانستان سفیر په توګه دنده ترسره کړې، دواړو وروڼو د مسکو په سفارت کې دیپلوماتیکې دندې هم ترسره کړې دي.
هوشنګ غیرت د یوې لسیزې راهیسې د یوه بل افغان سوداګر کمال نبيزاده،په مالي چارو کې فعال وو، چې په ۱۴۰۱ کال کې د ایران د نفتو د پلور او د سپاه قدس او حزبالله د ملاتړ په تور د امریکا له خوا تحریم شوی وو.
د دې تحریمونو له مخې، د دوی ټولې شتمنۍ چې په متحده ایالاتو یا د امریکايي ادارو تر کنټرول لاندې دي، کنګل کیږي.
په مسکو کې ځینو سرچینو ویلي چې دا تحریمونه ممکن د دوی پر نړیوالو سفرونو اغېز وکړي، خو د دوی پر سوداګریزو فعالیتونو به لږه اغېزه ولري، ځکه چې د دوی اصلي فعالیتونه په روسيې او نورو غیر لویدیځو هېوادونو کې دي.
د دې دوو سوداګرو ترڅنګ، د روسيې په ثبت شویو یو شمېر شرکتونو باندې هم تحریمونه لګول شوي چې د سهراب غیرت او د هغه د همکارانو تر مدیریت لاندې وو.
یو ایراني تبعه، حسن جعفري، چې په ترکیه کې مېشت دی، هم په دې شبکه کې د پیسو مینځلو او د تحریمونو د مخنیوي په هڅو کې د همکارۍ په تور شامل دی.
دا تحریمونه د یمن د جګړې او د حوثیانو د ملاتړ د شبکو پر وړاندې د امریکا د دوامداره هڅو یوه برخه ده.
حوثیان، چې د ایران له ملاتړه برخمن دي، په وروستیو میاشتو کې یې د سره سمندر په اوبو کې پر نړیوالو کښتیو او امریکايي بېړیو بریدونه زیات کړي دي.
د هوشنګ او سهراب غیرت په څېر کسانو رول د دې ښکارندوی دی چې دا شبکه له سیمهییزې کچې هاخوا، نړیوال ابعاد لري او د روسيې، اوکراین او منځني ختیځ ترمنځ اړیکې پکې شاملې دي.
