کابل ټیلیګراف – ۱۶ وری ۱۴۰۴ لمریز کال
د ایران پولیس وایي، د دې هېواد په بېلا بېلو سیمو کې د تېرو درې اونیو په ترڅ کې یو میلیون ۱۶ زره او ۳۴۳ ترافیکي پېښې ثبت شوې دي.
د خپرو شویو شمېرو له مخې، په دې پېښو کې ۸۸۰ کسانو خپل ژوند له لاسه ورکړی او زرګونه نور ټپیان شوي دي، خو په خپره شوې اعلامیه کې د ټپيانو دقیق شمېر ندی ورکړل شوی.
راپورونه ښيي چې په ایران کې ترافیکي پېښې هر کال د سلګونو کسانو ژوند اخلي.
کارپوهان د موټر چلوونکو بېاحتیاطي، د موټرو ټیټ کیفیت او د سړکونو خرابوالی د دې پېښو اصلي لاملونه بولي.
د ایران د لارښوونې او موټر چلولو چارواکو څو ځله د ترافیکي تلفاتو د زیاتوالي په اړه خبرداری ورکړی، خو د پېښو کچه لا هم د لوړېدو په حال کې ده.
